Авиаотын бағасын негізсіз көтерген: Тараз әуежайына айыппұл салынды
Бәсекелестікті қорғау және дамыту агенттігінің хабарлауынша, Тараздағы «Әулие-Ата» халықаралық әуежайын тексеру кезінде авиаотынды монополиялық жоғары бағамен сатқаны анықталған.
Астана, NEGE. Әуежай тергеп-тексеру нәтижелерімен келіспей, оны бірінші және екінші сатыдағы соттар арқылы даулаған. Дегенмен облыстық соттың әкімшілік істер жөніндегі сот алқасы тергеп-тексеру нәтижелері заңды әрі негізді деп таныған. Ақыр соңында әуежай өкілдері сотта өз кінәсін мойындаған.
«Кәсіпорын Әкімшілік құқық бұзушылық туралы кодекстің 159-бабының 3-бөлігі бойынша әкімшілік жауапкершілікке тартылып, оған 3,2 млн теңге мөлшерінде әкімшілік айыппұл салынды және монополиялық қызметті іске асыру нәтижесінде алынған 25,2 млн теңге мөлшеріндегі монополиялық кірісі тәркіленді», – делінген ресми хабарламада.
Бұған қоса, монополияға қарсы орган компанияға бәсекелестікті қорғау саласындағы заңбұзушылықтарды тоқтату жөнінде нұсқама берді. Нұсқама бойынша әуежай өкілдері отын бағасын бұрынғыдан арзандатуы тиіс.