Ауыр атлетикадан жасөспірімдер арасындағы ӘЧ басталды
Грекияда жасөспірімдер арасында ауыр атлетикадан әлем чемпионатында қазақстандық спортшылардың қатысуымен өтетін жарыс кестесі белгілі болды.
Алматы, NEGE. Әлем чемпионаты 2-10 мамыр аралығында Грекияның Ираклион қаласында өтеді. Онда ел құрамасынан сегіз спортшы бақ сынайды. Ел құрамасынан жарыс жолына алғашқы болып Екатерина Алякина (55 келі) 3 мамыр күні шығады.
Ол А тобында сынға түседі. Одан кейін 5 мамырда 73 келі салмақта F тобында ел құрамасынан Петр Хребтов мен Алексей Чуркин жүлделерді сарапқа салады. Ал 6 мамырда 81 келіде А тобында Денис Полубояринов пен Егор Шерер жарыс жолына шығады.
А тобында 7 мамырда Клим Басаргин (89 келі), 8 мамырда Сұлтан Мейрам (96 келі) сайысқа түседі. Ел құрамасынан әлем чемпионатын Айсамал Сансызбаева (87 келіден жоғары) 10 мамырда А тобында түйіндейді.
Жасөспірімдер арасындағы әлем чемпионаты 1975 жылдан бері тұрақты түрде өткізіліп келеді. Қазақстан құрамасы 2021 жылғы әлем чемпионатында 3 алтын, 2 күміс, 1 қола медаль еншілеп, жалпы командалық есепте көш бастаған еді.
