«Ауыл» партиясы Ермұхамет Ертісбаевтың сөзіне байланысты мәлімдеме жасады

Бұл туралы ҚазАқпарат хабарлады.

Астана. NEGE. «Халық партиясының жетекшісі Е.Ертісбаевтың «Ауыл» партиясының кандидаты Ж. М. Дайрабаев тарапына қарата айтқан қисынсыз пікірі қазақстандық қоғамды қатты қынжылтып, саясаткерді әділ айыптау тудырды. Бұл адамның айтқандары Президент сайлауы қарсаңындағы ашық және адал саясат ережелеріне сәйкес келмейді және қорлау сарынындағы сөз авторын құрметке бөлемейді», - дейді «ауылдықтар».

Олардың пікірінше, бұл «Ауыл» партиясының мінсіз беделге ие үміткері арқылы өз атын шығаруға тырысқан популистік әрекеттен басқа ештеңе емес.

«Бөгде жанның есімін келеке етуге әрекеттену тәрізді азаматтық кемсітушілікпен шектесетін жиіркенішті ерсі қылықтар – мәдениетсіздік пен әдепсіздік көрінісі.

Біз басқа партия жетекшілерінің саяси ергежейлі сияқты әрекетіне мүсіркеушілікпен қараймыз.

Мұндай тәсілдер қоғамның адами қағидаттар мен адамгершілік атты мемлекеттік негіздерге деген сеніміне нұқсан келтіріп, міндетті түрде кері әсер етеді.

Біз жалпыадамзаттық құндылықтар мен ұлтымыздың игі дәстүрлерін құрметтейтін және дәріптейтін қазақстандық қоғамда мұндай құбылыстарға орын жоқ екеніне сенімдіміз», - дейді «Ауыл» партиясы.