Ауыл шаруашылығында өтірік есеп беретіндер жауапкершілікке тартылады – Министр
Ауыл шаруашылығы саласында өтірік есеп беру мәселесі әлі де бар. Ауыл ауданға, аудан облысқа, облыс республикаға өтірік есеп беретін жағдайлар кездеседі.
Оған тосқауыл бар ма? Өтірік есеп беру үрдісі қашан тоқтайды? Орталық коммуникациялар қызметі алаңында өткен баспасөз мәслихаты барысында NEGE тілшісі жолдаған сауалдарға Ауыл шаруашылығы министрі Айдарбек Сапаров жауап берді.
«Бұл мәселені енді қолға ала бастадық. Биылдан бастап тоқтайды. Осы жылдың аяғына дейін алдымен өсімдік шаруашылығын, сосын мал шаруашылығын орнына келтіріп, есепті түзейміз. Сол кезде өтірік есеп беру көрсеткіші азаяды. Картоптың, бидайдың мысалын атап өттік. Бұл жерде де қосып айтылған көрсеткіштер болған. Соны азайту үшін өтірік есеп беретіндерге тыйым саламыз. Ол көп жылдан бері жалғасып келе жатқан жұмыс. Оны биылдан бастап тоқтататын болсақ, ары қарай да бақылауда болады. Өтірік есеп беретіндерді жауапкершілікке тартамыз», - деді ауыл шаруашылығы министрі Айдарбек Сапаров.
