Ауғанстанда жер сілкінісінен 20 адам қаза тапты
Ауғанстанның солтүстігінде магнитудасы 6,3 балл болатын жер сілкінісінен кемінде 20 адам қаза тапты.
Астана, NEGE. Жергілікті билік өкілдері жүздеген адамның жараланғанын, қаза болғандар санының артуы мүмкін екенін хабарлады.
Жер сілкінісі дүйсенбіге қараған түні болды. Оның ошағы Ауғанстандағы ең ірі қалалардың бірі Мазари-Шарифтің жанында орналасқан.
АҚШ Геологиялық зерттеу институтының мәліметінше, жер сілкінісінің ошағы 28 шақырым тереңдікте болған.
«Талибан» үкіметінің Денсаулық сақтау министрлігінің өкілі Шарафат Заман Амардың айтуынша, зілзала салдарынан жиырмадан астам адам қаза тауып, 320-дан астам адам жарақат алды.
«Талибтердің» Балх провинциясындағы баспасөз өкілі Хажи Заид Шолгара ауданында «көп адам жарақат алғанын» X әлеуметтік желісіндегі парақшасына жазды. Оның айтуынша, провинцияның барлық дерлік аймағынан жеңіл жарақат алғандар және тұрғын үйлердің зақымдануы туралы хабарлар келіп түсуде.