Ауа райының нашарлауына байланысты республикалық жолдарда көлік қозғалысына шектеулер енгізілді
ҚазАвтоЖол үш облыста жолдардың жабылғаны туралы шұғыл мәлімдеме жасады.
Алматы, NEGE. 2024 жылғы 29 желтоқсан сағат 23:00-де Қызылорда облысында ауа райының бұзылуына байланысты «Самара-Шымкент» автожолының 1357-2055 шақырым аралығында (Арал қаласынан Түркістан облысының шекарасына дейін) барлық көлік түрлерінің қозғалысына шектеу қойылды.
Жолдың қайта ашылуы 2024 жылғы 30 желтоқсан сағат 08:00-ге жоспарланған.
Сонымен қатар, 29 желтоқсан сағат 23:00-де ауа райының нашарлауына байланысты келесі республикалық маңызы бар автожолдарда да көлік қозғалысына шектеулер енгізіледі:
Қызылорда облысы:
«Қызылорда-Павлодар» автожолының 12-216 шақырым аралығында (Қызылорда облысының шекарасынан Ұлытау облысының шекарасына дейін);
Түркістан облысы:
«Самара-Шымкент» автожолының 2055-2095 шақырым аралығында (Қызылорда облысының шекарасынан Түркістан қаласына дейін);
Ұлытау облысы:
«Қызылорда-Павлодар» автожолының 216-424 шақырым аралығында (Қызылорда облысының шекарасынан Жезқазған қаласына дейін).
Жүргізушілерге жолға шықпас бұрын жағдайды тексеріп, сақтық шараларын сақтауға кеңес беріледі.
