Атыраулық «хакер» Түркияда ұсталды
Атырау облысында бір отбасының іс-түссіз жоғалғанын зерттеген «хакер» Түркияда ұсталды. Бұл туралы Атырау облыстық прокуратурасы «Ақ Жайық» басылымына хабарлады.
Астана, NEGE. Халықаралық іздеуде болған ер адам ақпан айында Түркияның Самсон қаласында қолға түскен. Қазір Қазақстанның Бас прокуратурасы оны елге экстрадициялау үшін қажетті құжаттарды дайындап жатыр.
Тергеу мәліметінше, ол адамдарды түрлі сылтаумен алдаған. Атап айтқанда, инвестиция салуды, IT саласында оқытуды, бұғатталған аккаунттарды ашып беруді, ақша шешіп беруге көмектесуді немесе техника сатуды ұсынып, азаматтардың сеніміне кірген. Осылайша олардың ақшасын иемденген. Келтірілген жалпы шығын көлемі 13 млн теңгеден асады.
Қаңтар айында Атырау қаласының мамандандырылған тергеу соты күдіктіні сырттай қамауға алуға санкция берген.
Айта кетейік, ол бұған дейін Атырау облысында бір отбасының іс-түссіз жоғалуын өз бетінше зерттеп, әлеуметтік желілерде «Атыраулық хакер» ретінде танылды.