Атырауға шетелдік 11 адамға босқын мәртебесі берілген
Атырау облысында босқын мәртебесін алу үшін өзге елдің 96 адамы өтініш білдірген.
Алматы, NEGE. Алайда, олардың арасынан 11 адамға босқын мәртебесін беруге шешім қабылданған, деп хабарлайды Kazinform.
Атырау облыстық жұмыспен қамтуды үйлестіру және әлеуметтік бағдарламалар басқармасының басшысы Азамат Мәмбетовтің айтуынша, босқын мәртебесін алуға өтініш берген азаматтар қатаң бақылауға алынған.
«Биыл 1 желтоқсанға дейін басқармаға босқын мәртебесін алу үшін 96 адамнан өтініш түсті. Пана іздеп келгендердің арасынан 11 адамға босқын мәртебесі берілді. Ал, 55 адамның босқын мәртебесіне берген өтініші қайтарылып, олар елдеріне оралды. Өтініш берген 4 адам ықтиярхат алды», – деп хабарлады Азамат Мәмбетов.
Оның дерегіне қарағанда, 11 адамның басқа өңірге көшіп кеткені анықталған. Сондай-ақ 9 адам елдің аумағынан ескертусіз шығып кеткен.
«Пана іздеген адам ретінде 6 адам тіркелді. Оның ішінде 1 ер, 3 әйел, кәмелетке толмаған 2 бала бар. Олардың бәрі – Украина Республикасының азаматтары», – деп мәлім етті Азамат Мәмбетов.
