Атырауда көлік ұрлап, қоқыс жәшігіне жасырынған ер адам ұсталды

Алматы, NEGE. 5 желтоқсан күні уақыт 20:00 шамасында 49 жастағы әйел “102” арнасына хабарласып, осыдан бес минут бұрын өзінің үйінің алдында оталып тұрған Nissan Almera автокөлігін белгісіз адам заңсыз айдап әкеткенін айтты.

Аталған хабарлама бойынша тәртіп сақшылары сергек бейнебақылау жүйесі арқылы автокөліктің Алиев көпіріне бағыт алып бара жатқанын анықтап, патрульдік полиция қызметкерлеріне бағыттама береді. Оқиға орнына жедел жеткен Батыс-15 қызметкерлері автокөлікті Махамбет-Сатыбалдиев көше қиылысында тоқтатқан кезде күдікті полиция қызметкерлеріне бағынбай, автокөлікпен қашып кетеді.

Бұнымен қоймай, күдікті жол ережесін өрескел бұзып, қарсы бағытқа шығып, жол-көлік оқиғасын жасайды. Кейін полиция қызметкерлерінен қашып, жақын маңдағы қоқыс жәшігіне тығылып қалғаны белгілі болды.

Оқиға орнына дереу жеткен полиция қызметкерлері күдіктіні ұстады. Тексеру барысында 34 жастағы азаматтың “Автокөлікті айдап әкетуші” және “Қалта ұрысы” тізімдік санатында есепте тұрғаны анықталды.

Нәтижесінде автокөлік арнайы тұраққа қойылып, ұсталған азамат жедел-тергеу тобына тапсырылды.