Атырауда полиция басшылары қызметінен шеттетілді
Желіде Атырауда қалалық және облыстық полиция департаменттерінің лауазымды қызметкерлері жұмыстан босатылғаны туралы ақпарат тарады.
Астана, NEGE. Ішкі істер министрлігі бұл ақпаратты растады.
«Қызметтік-әскери тәртіптің өрескел бұзылуы, тиісті бақылау мен жұмыс ұйымдастырудың жеткіліксіздігі анықталуына байланысты Ішкі істер министрінің бұйрығымен Атырау қаласы полиция басқармасының бастығы, сондай-ақ Атырау облысы полиция департаментінің Өзіндік қауіпсіздік басқармасы мен Есірткі қылмысына қарсы іс-қимыл басқармасының басшылары атқарып отырған лауазымдарынан шеттетілді», – делінген хабарламада.
Айта кетейік, Атырау қаласы полиция басқармасын 2024 жылғы мамырдан бастап Бақтыбек Исаев басқарып келді. Бұл қызметке дейін Маңғыстау облысы полиция департаменті бастығының орынбасары қызметін атқарған.
