Атырауда мұнай компаниясының менеджерін аса қатыгездікпен өлтірген ер адамға үкім шықты
Атырау облысының мамандандырылған ауданаралық қылмыстық істер жөніндегі соты 46 жастағы Бибігүл Шпанованы аса қатыгездікпен өлтіру ісі бойынша үкім шығарды.
Алматы, NEGE. Марқұм ірі мұнай-газ компаниясы NCOC-де менеджер болып қызмет атқарған. Бұл туралы облыстық соттың баспасөз қызметі хабарлады.
Сотта анықталғандай, айыпталушы Атырау қаласының 38 жастағы тұрғыны, Рембаза ықшам ауданында туған Арман Жетпісов. Ажырасқан, ресми түрде жұмыссыз, бұған дейін алаяқтық фактілері бойынша қылмыстық істерде фигурант болған. Біраз уақыт өзін жөндеу жұмыстарымен айналысатын шебер ретінде көрсетіп, жәбірленушінің сеніміне кірген.
«2022 жылы жәбірленуші жаңа пәтер сатып алып, оған жөндеу жұмыстарын жүргізу барысында Жетпісовпен танысқан. Айыпталушы жәбірленушіден автотұрақ орнын жеңілдікпен сатып алуға көмектесемін деп 400 мың теңге алған. Бұл қаражатты иемденіп, уәдесін орындамаған. 2023 жылы жәбірленуші қайта хабарласып, мәселенің шешілмегеніне байланысты шағым түсіретінін айтып, ескерткен. Ол жүкті екенін де айтқан. Сол күні айыпталушы мас күйде жәбірленушінің үйіне келіп, қылмыстық әрекетін жүзеге асырған», – делінген хабарламада.
Ол бетперде киіп, пышақпен қаруланып, жәбірленушіні зорлап, кейін аса қатыгездікпен өлтірген.
Кейін пәтерді тінтіп, сейфтен ірі көлемде ақша мен алтын бұйымдарды ұрлаған. Сондай-ақ марқұмның автокөлігі мен ұялы телефонын алып кеткен. Жәбірленушіге келтірілген материалдық залал 13 миллион теңгеден асқан.
Сонымен қатар сотталушыға ҚР Қылмыстық кодексінің бірнеше бабы бойынша айып тағылып, сот отырысында айыпталушының кінәсі толық дәлелденді. Жәбірленушілердің және куәгерлердің айғақтары, сараптама қорытындылары, бейнежазбалар мен заттай айғақтар сотқа ұсынылғаны жазылған.
Сот жазаны жеңілдететін мән-жайларды анықтамады. Қылмысты мас күйде жасағаны ауырлататын жағдай ретінде қарастырылды.
«Сот шешімімен Арман Жетпісов барлық эпизод бойынша кінәлі деп танылып, өмір бойына бас бостандығынан айырылды. Сонымен қатар, марқұмның туыстарына материалдық және моральдық шығын өндірілді. Үкім заңды күшіне енген жоқ», – делінген сот таратқан ақпаратта.
