Атырауда есірткі қылмысына қарсы күрес мәселелері талқыланды
Облыс әкімі Серік Шәпкеновтің төрағалығымен нашақорлықтың алдын алу және есірткі қылмысына қарсы іс-қимыл мәселелері бойынша өңірлік штабтың кезекті отырысы өтті.
Жиында есірткі қылмысына қарсы іс-қимыл басқармасының бастығы Әлішер Нұршаев, облыстық прокуратураның басқарма басшысының орынбасары Индира Сейтқасымова және облыс әкімі аппаратының қауіпсіздік және құқықтық тәртіпті қамтамасыз ету бөлімінің басшысы Лейла Бердіғалиевалар баяндама жасап, өңірдегі заңсыз есірткі айналымы, криминогендік жағдай және алға қойған міндеттер жайында баяндады.
Биыл облыста есірткіге қатысты қылмыс саны 1,8%-ға азайған. Заңсыз айналымнан 247 келіден астам есірткі заттары тәркіленген. Қаржылық тергеулердің нәтижесінде криптовалюталық және банк шоттары бұғатталған.
Штаб төрағасы Серік Шәпкенов нашақорлықтың алдын алу шараларына ерекше назар аударды. Өңірде жүздеген профилактикалық іс-шара өткізіліп жатқанымен, тиімділігі әлі де болса жеткіліксіз. Аймақ басшысы кәмелетке толмағандарды нашақорлықтан қорғау бағытындағы жұмыстарға жаңаша көзқарас қажет екенін де атап өтті.
Отырыс соңында нақты шекара бекеттеріндегі бақылауды күшейту, жүйелі скрининг енгізу, цифрлық кеңістіктегі есірткі саудасына қарсы күресті жетілдіру, есірткі қылмыстарымен бірге қаржы операцияларын да тергеп-тексеру турасында ұсыныстар айтылды.
