Шекарада 300 мың доллардай қаржыны шетелге заңсыз шығармақ болған әйел ұсталды
Ұлттық қауіпсіздік комитетінің Шекара қызметі мәліметінше, 2 маусымда Атырау облысындағы «Құрманғазы» өткізу пунктінде тексеруден өту кезінде қазақстандық әйелдің жеке жүгінен 299,6 мың АҚШ доллары табылған. Ол қомақты қаражатты заңсыз шетел асырмақ болған.
Астана, NEGE. Сондай-ақ ҰҚК өкілдері осы жылы 3 маусымда Жамбыл облысы шекарасында жасырын түрде 102,5 млн рубль өткізуге әрекеттенген алты шетелдік ұсталғанын хабарлады.
«Материалдар процестік шешімдер қабылдау үшін құзырлы органдарға берілді», – делінген хабарламада.
Жалпы жыл басынан бері декларацияланбаған валютаны әкетудің 681 әрекеті тоқтатылған. Шетел асырмақ болған қаражаттың жалпы сомасы 6,9 млрд теңгені құраған.
ҰҚК Шекара қызметі 10 мың доллардан асатын қолма-қол ақшаны республикадан тыс жерге әкетуге тыйым салынатынын еске салады.