Атырауда 30-дан астам медицина қызметкеріне әлеуметтік қолдау көрсетілді
Биыл өңірде медицина саласына жаңадан келген 31 маманға біржолғы әлеуметтік көмек берілді. Қазір тағы 68 медицина қызметкерінің құжаты қаралуда, – деп хабарлайды Өңірлік коммуникациялар қызметі.
2024 жылдың қорытындысы бойынша өңірде дәрігер мамандарына қажеттілік 107 бірлікті құрады. Оның ішінде 39 маман аудандық медицина ұйымдарына қажет. Сұранысқа ие мамандықтар қатарында акушер-гинекологтар, терапевтер, жалпы тәжірибелі дәрігерлер және өзге де бағыттағы мамандар бар.
Кадрлық тұрақтылықты қамтамасыз ету мақсатында 2023–2025 жылдарға арналған медицина қызметкерлерін өңірге тартуға арналған іс-шаралар жоспары жүзеге асырылуда. Мәслихат шешіміне сәйкес, медицина қызметкерлеріне жұмыс істейтін жеріне қарай 5 млн теңгеден 10 млн теңгеге дейін біржолғы әлеуметтік қолдау көрсету көзделген.
2022 жылдың 1 қаңтарынан бастап мемлекеттік медицина ұйымдарына жұмысқа орналасқан дәрігерлер үшін «Отбасы банкі» АҚ арқылы 5 пайыздық жеңілдетілген кредит беру бағдарламасы іске асырылып келеді. Аталған бағдарлама аясында бүгінгі күнге дейін 43 медицина маманы тұрғын үймен қамтылған.
