Атырауда 200-ден астам көпқабатты үйді реновация аясында бұзады
Атырау қаласында тұрғын үй қорын жаңарту мақсатында 225 көпқабатты үй сүріліп, 3 395 пәтердің тұрғындары жаңа баспанаға көшірілмек. Бұл туралы Атырау облысы әкімдігінің баспасөз қызметі хабарлады.
Алматы, NEGE. Атырау облысының әкімі Серік Шәпкеновтың төрағалығымен өткен жұмыс жиынында қаладағы реновация мәселелері талқыланды. Қала әкімі Шакир Кейкиннің айтуынша, ескі үйлерді сүру жұмыстары бес негізгі аймақта жүргізіледі. Олардың қатарында Мұса Баймұханов көшесі, Орталық ықшамаудан, Азаттық даңғылы, Жилгородок, Мұхтар Әуезов даңғылы және Балықшы ықшамауданы бар. Ең тозған үйлердің көпшілігі С.Датов, М.Баймұханов, Г.Кожакаев, А.Стахановцев көшелерінде және Азаттық, М.Әуезов, Бейбітшілік даңғылдарында орналасқан.
Қала әкімінің айтуынша, жаңа тұрғын үй кешендерінің салынуы азаматтарды жайлы әрі заманауи баспанамен қамтамасыз етіп қана қоймай, қаланың сәулеттік келбетін жақсартуға және шағын және орта бизнесті дамытуға мүмкіндік береді.
Қазіргі таңда 2023-2025 жылдар аралығында 12 үйдің 154 пәтері босатылып, тұрғындар жаңа үйлерге көшірілген.
