Атырау облысында «Сарайшық» визит-орталығы ашылды
Атырау облысының Махамбет ауданында «Сарайшық» визит-орталығы ашылды. Мәдениет және спорт министрі нысанның жұмысымен танысты, деп хабарлайды ҚазАқпарат.
Атырау, NEGE. «Визит-орталығының жұмысымен танысу барысында қонақтардың тамақтануына және түнеп шығуына жайлы жағдай жасалған орындарды, сондай-ақ келушілер Қазақ хандығы, Алтын Орда және одан бұрынғы дәуірлер тарихымен таныса алатын экспозициялық залды араладым.
Ақпарат үш тілде беріледі. Зал экрандармен және ақпараттық терминалдармен жабдықталып, мультимедиялық технологиялар қолданылады.
Сондай-ақ, археология залында болдым. Мұнда қалашықтан табылған жәдігерлер мен ұлы ғалым Әлкей Марғұланға арналған шағын экспозиция ұсынылды», - деп жазды министр.
Мәлім етілгендей, визит-орталықта балаларға арналған шығармашылық секциялар да бар.
«Сарайшық» визит-орталығын іске қосу – бұл үлкен істің бастамасы ғана. Біз нысанды дамытудың бесжылдық жоспарын әзірледік, соның арқасында бұл киелі орынды шетелдік және ішкі туристер үшін тартымды етеміз деп күтеміз», - дейді А.Оралов.
Айта кетейік, Қазақстанда бұдан бөлек, тағы үш визит-орталық жұмыс істейді: Алматы облысында «Таңбалы», Ұлытау облысында «Ұлытау» және Түркістан облысында «Отырар».
Биыл үш визит-орталықтың құрылысын аяқтау жоспарланып отыр. Олар – еліміздің оңтүстігіндегі «Сауран», «Гауһар-ана» және «Ордабасы» орталықтары.
