Атырау облысында жоғалған аңшының мәйіті табылды

Астана, NEGE. Атырау облысы ТЖД 5 күн бұрын жоғалып кеткен 1964 жылы туған Өтебай Сабировты іздеу жұмыстары аяқталғанын хабарлады. 19 желтоқсан күні сағат 15:10 шамасында іздестіру тобы Каспий теңізі жағалауына жақын орналасқан «Ботахан» кен орнынан оның мәйітін тапты.

Аңшы 14 желтоқсан күні аң аулауға шығып, содан бері хабар-ошарсыз кеткен.

«Төтенше жағдайлар департаментіне хабар түскен сәттен бастап іздеу-құтқару жұмыстары жедел басталды. 16 желтоқсан күні «Ботахан» кен орнынан 30 шақырым қашықтықта УАЗ маркалы автокөлік табылғанымен, көлік ішінде жоғалған азамат болмаған. Кейін әуеден барлау жүргізу үшін Төтенше жағдайлар министрлігінің тікұшағы тартылып, 20 шақырым радиуста аумақ тексерілді», – деп хабарлады облыстық ТЖД өкілдері.

Іздеу жұмыстары төрт тәулік бойы үздіксіз жүргізілді. Оған Атырау облысы төтенше жағдайлар департаментінің күштері мен құралдары, әскерилер мен полицейлер, сондай-ақ марқұмның туыстары қатысқан. Іздеу жұмыстарына барлығы 100 адам, 21 техника, 2 кинологиялық есептоп және 3 ұшқышсыз ұшу аппараты жұмылдырылған.

Айта кетейік, Өтебай Сабировтың достарымен аң аулауға шығып, хабар-ошарсыз кеткенін желіде туыстары хабарлаған еді.