Атырау облысында әйелін соққыға жыққан әкім сотталды
Атырау қаласының №2 сотында ауданның бұрынғы әкімі Ринат Ибрагимовке қатысты денсаулыққа қасақана ауырлығы орташа зиян келтіру фактісі бойынша қылмыстық іс қаралды (ҚК-нің 107-бабы 2-бөлігінің 3-тармағы), деп хабарлады Жоғарғы сот.
Алматы, NEGE. «2023 жылғы 31 мамырда Атырау қаласында пәтерде И.Р. және оның әйелі У.А. арасында жанжал болған. Жанжал кезінде И.Р., жәбірленушінің өзіне материалдық тәуелділігін пайдаланып, осы негізде жанжал шығарып, әйелі У.А-ны оң иығынан ұстап, есікті жауып, бөлмеге кіргізген. Ешкімнің кедергі жасамайтынына көз жеткізіп, денсаулығына қасақана зиян келтіру мақсатында У.А.-ны еденге құлатқан және сол жақ санынан бірнеше рет тепкілеген, соның салдарынан жәбірленуші У.А. 5-ші омыртқасының сынуы түрінде орташа ауырлықтағы зақым алған. Сотталушының кінәсі жәбірленушінің айғақтарымен, сараптама қорытындысымен және басқа да дәлелдемелермен дәлелденді», делінген сот хабарламасында.
Қылмыс жасалған кезде қолданыста болған ҚК-нің 107-бабы 2-бөлігі 3-тармағының санкциясы 2000 АЕК-ке дейінгі мөлшерде айыппұл салу немесе түзеу жұмыстары түріндегі жазаны сол мөлшерде, не 800 сағатқа дейінгі мерзімге қоғамдық жұмыстарға тарту, не 3 жылға дейінгі мерзімге бас бостандығын шектеу, не сол мерзімге бас бостандығынан айыру жазасын қарастырады.
Бұл қылмыс заң бойынша орташа ауырлық дәрежесіне жатқызылады. Сотпен жаза түрін таңдау кезінде Ринат Ибрагимовтің бұрын соттылығы жоқтығы, мінезі оң сипатталғаны ескерілді. Сот үкімімен оған 2 жылға бас бостандығын шектеу жазасы тағайындалды.
Жәбірленушінің 20 млн теңге моральдық шығын өндіру туралы азаматтық талап қоюы ішінара қанағаттандырылып, Ринат Ибрагимов жәбірленуші әйелінің пайдасына 2 млн теңге моральдық зиянды өтейтін болды.
Соттың үкімі заңды күшіне енген жоқ.
