Атамбаевтың ахуалы нашар
Қырғызстанның экс-президенті Алмазбек Атамбаевтың денсаулығының күрт нашарлап кеткендігі мәлім болды. Мұндай ақпаратты оның ұлы Сейид хабарлап отыр.
Алматы, NEGE. «Менің әкемнің қан қысымы өте төмен. Дәрігерлердің айтуынша, бұл кез-келген уақытта инсульт немесе инфарктқа әкеліп соғуы мүмкін», – деп жазды ол өзінің Facebook парақшасында.
Сейид Атамбаевтың айтуынша, экс-президенттің соңғы қан қысымының өлшемі 76-60 болған.
Естеріңізге сала кетсек, 7-8 тамызда Қырғызстанның арнайы қызметтері экс-президент Атамбаевты астанадан 20 шақырым жерде орналасқан Қой-Таш ауылындағы резиденциясында ұстау үшін операция өткізді. Бұрынғы мемлекет басшысының жақтастары мен қауіпсіздік күштері арасындағы екі күндік қақтығыста арнайы жасақтың 1 жауынгері көз жұмып, 136 адам жарақат алған.
Содан бері Атамбаев республиканың Ұлттық қауіпсіздік мемлекеттік комитетінің тергеу изоляторында қамауда. Оған бірқатар ауыр және аса ауыр қылмыс жасады деген айыптар тағылып отыр.
