Астананың инфрақұрылым мәселелері талқыланды
Астана қаласы мәслихатының төрағасы Ерлан Каналимов пен елорда әкімінің орынбасары Нұрлан Солтанбеков мәслихат депутаттарымен бірге бас қаланың келешектегі инфрақұрылымға қатысты мәселелерін талқылады. Бұл туралы Ерлан Каналимов өзінің әлеуметтік желідегі парақшасында жазды.
«Әріптестермен және елорда әкімінің орынбасары Нұрлан Солтанбековпен бірге қаламыздың алдағы жылдары болуы ықтимал инфрақұрылымдық мәселелерді талқыладық. Атап айтсақ, халықтың көбеюі, құрылыс қарқыны, сондай-ақ жылу және сумен жабдықтау желілерінің тозуы.
Астана су қоймасы тиісті деңгейде мүлдем тазаланбаған. 2028 жылға қарай су қоймасы резервке айналуы мүмкін,
Есілге су ағызу Қ.Сатбаев арнасы арқылы жүзеге асырылады. Сонымен қатар, резервтік су құбырын жобалау басталды. Сумен жабдықтау мәселелерін шешу үшін шамамен 11,5 миллион шаршы метр тұрғын үйді төрт жылда кезең-кезеңімен пайдалануға беру ұсынылды.
Инженерлік инфрақұрылымның бірқатар мәселелері бар елордамыздың оң жағалауын қалай абаттандыру туралы әңгімелестік. Жақын арада осы мәселелерді шешу үшін комиссия құрылады, оның құрамына Астана қаласы мәслихатының әр тұрақты комиссиясынан бір депутат кіреді», - деп жазды Ерлан Каналимов.
