Астанадағы үздік жас отбасы анықталды
Елорданың жас отбасылары үшін «Үздік жас отбасы» жалпықалалық байқауы өтті. Бұл байқау отбасы институтын қолдау және дамыту мақсатында қалалық жастар саясаты басқармасы «Отбасы-бақыт мекені» кешенді жобасының аясында ұйымдастырылды.
Астана, NEGE. Байқау жүлдегерлері арнайы сертификаттармен марапатталды. Яғни, бұл сертификаттар арқылы тұрмыстық техника мен электрониканы сатып алуға болады. Бірінші орын иегерлеріне 500 мың, екінші орынға 350 мың, ал үшінші орынға 250 мың теңге сыйақы берілді.
Сондай-ақ бірде-бір финалист марапатсыз қалған жоқ, финалға өткен жеті отбасы да 100 мың теңге көлемінде сыйлық алды.
Астана әкімдігінің ресми сайты мәліметінше, байқауға 53 отбасы қатысып, оның 10-ы ғана финалға жолдама алған.
Жас отбасылар «Неге біз бұл байқауда жеңіске жетуіміз керек?» деген тақырыпта видео-таныстыру дайындады. Ал финалға өткен жеңімпаздар Instagram-да басылған лүпілдер мен пікірлердің саны бойынша анықталды.
– Мұндай іс-шаралар отбасы ішіндегі қарым-қатынастарды нығайтуға, балалар мен ата-аналарды жақындастыруға ғана емес, сонымен қатар жас балаларды салауатты өмір салты мен әлеуметтенуге баулуға ықпал етеді, – дейді ұйымдастырушылар.
Байқауға қатысушылар отбасымен көңілді уақыт өткізіп, жақсы көңіл-күймен тарқады.
Айта кетсек, «Отбасы – бақыт мекені» жобасы аясында Астанада отбасылық марафон, жас отбасыларға, жүкті әйелдер мен ата-ана болуды жоспарлап отырған жас жұбайларға арналған семинар-тренингтер, жоғары оқу орындары мен жоғары оқу орындарының студенттері арасында факультативтік сабақтар, бейнероликтер, фотосуреттер конкурстары өткізіледі.
