Астанадағы автобус апаты: әкім аяғынан айырылған қыздың жағдайын айтты
Астана әкімі Жеңіс Қасымбек осы жазда автобус апатынан екі аяғынан айырылған сегіз жасар Алуа Бекеннің отбасына әкімдік тарапынан уәде етілген пәтер берілгенін мәлімдеді.
Астана, NEGE. Бұл жаңалықты қала басшысы БАҚ өкілдерімен өткен брифингте айтты. Журналистер әкімнен Алуаның отбасына қандай көмектер көрсетілгенін сұрады.
«Ол қарындасымыздың аты – Алуа. Өкінішке қарай, сондай жағдай болды. №1 автопарктің автобусы болатын. Медицина жағынан да, басқа жағынан да әкімдік көмек көрсетті және №1 автопарк 20 млн теңге көлемінде төлемақы берді. Сондай-ақ қаланың демеушілері тарапынан қосымша қаражат төленді.
Уәде берілген пәтер берілді. Ол пәтерде жөндеу жұмыстары басталып жатыр. Қазір тұрып жатқан үйдің жалдау ақысын әкімдік төлеп жатыр», – деді Жеңіс Қасымбек.
Ол Алуа қазір мектепке барып жүргенін, мектеп тарапынан да қажет көмектер көрсетіліп жатқанын атап өтті.
Еске салсақ, биыл 2 маусым күні Астанада автобус бағанаға соғылып, салдарынан 15 жолаушы зардап шеккен еді. Сол апат кезінде Алуа есімді сегіз жасар қыз ауыр жарақат алып, ауруханаға түсті, кейін екі аяғынан бірдей айырылғаны хабарланды.