Астанада жарықтың не себепті өшкенін арнайы комиссия анықтайды
Кеше кешке елорданың біраз ауданы жарықсыз қалды. Одан бөлек, су да тоқтатылды. Төтенше жағдайдың себебін арнайы комиссия қарайтын болады, деп хабарлайды Kazinform.
Алматы, NEGE. «Кешегі жағдай бойынша арнайы комиссия құрылды. Комиссия төтенше жағдайдың мән-жайын анықтаумен айналысады. Оның құрамына барлық мүдделі мемлекеттік орган өкілдері мен сарапшылар кіреді. Комиссия 10 күннің ішінде жұмысын аяқтайды, біз нәтижесін жариялаймыз», - деді Энергетика министрлігі атомдық және энергетикалық қадағалау мен бақылау комитетінің төрағасы Сұңғат Есімханов Астана қаласы коммуникациялар қызметі алаңында өткен баспасөз мәслихатында.
Одан бөлек, брифинг барысында БАҚ өкілдері әкімдік өкілінен көлік қозғалысы туралы сұрады.
«Бағдаршамдардың істен шығуына байланысты жол-көлік оқиғасы бойынша талдау жүргізіледі, ақпаратты ұсынамыз. Жалпы бізде зардап шеккендер туралы ақпарат жоқ. Егер тың ақпарат болса, бізбен байланыса аласыздар, біз оны тексереміз, Бірақ бүгінде ІІД-ге немесе әкімдікке мұндай жағдайлар не өтініш, шағым түскен жоқ», - деп жауап берді Астана қаласы әкімінің бірінші орынбасары Нұрлан Нұркенов.
