Астанада құрылысы ұзаққа созылған тұрғын үй кешені пайдалануға берілді
Бұл туралы елорда әкімдігінің ресми сайты жазды.
Алматы, NEGE. "Жылдар бойы құрылысы тоқтап тұрған нысанды аяқтадық. "Тұран Сығанақ" тұрғын үй кешенінің құрылысы сонау 2014 жылы басталған. Үлескерлер 9 жылдан кейін барып баспанасының кілтін алды", - деп мәлімдеді қала әкімі Жеңіс Қасымбек.
Нысан қабылданған кезде кейбір блоктарының құрылысы тіпті басталмаған. Үлкен жүйелі жұмыс жүргізілді.
"330-дан астам үлескер отбасының проблемасын шештік! Мұнда "Тұран Сығанақ" тұрғын үй кешенінің тұрғындарынан бөлек құрылысы ұзаққа созылған өзге де нысандардың үлескерлері баспаналы болды", - деп бөлісті қуанышты жаңалықты қала басшысы.
Астана әкімдігі биыл құрылысы ұзаққа созылған 30-дан астам тұрғын үй кешенін аяқтауды жоспарлап отыр. Осылайша, 4 мыңға жуық үлескер отбасы баспаналы болмақ.