Астанада жас отбасылардың қаржылық сауаттылығын арттыруға арналған оқу курсы өтті
Астанада «Отбасы – бақыт мекені» жобасы аясында жас отбасылардың қаржылық сауаттылығын арттыру мақсатында «Бизнесті құру және жүргізу» атты оқу курсы ұйымдастырылды.
Астана, NEGE. Іс-шараның ұйымдастырушысы – Астана қаласының Жастар саясаты мәселелері басқармасы.
Курсқа 10 жас отбасы қатысты. Алдағы уақытта осындай тағы екі курс өткізу жоспарлануда. Бұл бағдарлама – Астанада өз ісін ашуды немесе бар бизнесін дамытуды көздеген жас отбасыларға арналған. Курста жеке кәсіпкерлік, ЖШС ашу, қаржыны тиімді басқару және басқа да өзекті қаржылық мәселелер бойынша тәжірибелік білім берілді.
Оқу бағдарламасы екі бөліммен өткізілді. Спикерлер ретінде қаржылық сауаттылық жөніндегі сарапшы-тренер Рауан Ерғалиев және қаржылық жоспарлау саласының белгілі маманы, тәжірибелік курстардың авторы, «FinIQ KZ» ЖШС директоры Лаура Байжарасова сөз сөйледі.
Ұйымдастырушылардың айтуынша, мұндай форматтағы оқу бағдарламасына сұраныс артып келеді. Бүгінде көптеген жас отбасы шығындар мен жинақтарды жоспарлау барысында қиындықтарға тап болады. Жоғары несие жүктемесі мен қаржылық мәдениеттің төмен деңгейі жеке әл-ауқатқа ғана емес, жалпы экономиканың тұрақтылығына да қауіп төндіреді.
Алдағы уақытта да мұндай курстар тұрақты түрде өткізілетін болады. Жақын арада бағдарламаны жаңа сарапшылар мен бизнес-практиктерді тарту есебінен кеңейту, сондай-ақ жастар мен отбасыларға арналған қосымша білім беру жобаларын іске қосу жоспарланып отыр.
Ұйымдастырушылардың пікірінше, курстарды жүйелі өткізу нәтижесінде қаржылық сауатты, белсенді әрі әлеуметтік тұрғыдан тұрақты жас буын қалыптасып, ол өз кезегінде қоғам мен экономиканың дамуына серпін береді. Аталған оқу бағдарламасы жас отбасылардың қаржы саласындағы білімін кеңейтіп, іскерлік қабілеттерін шыңдауға мүмкіндік беруде.
