Астанада үй иесінің алтын бұйымдарын қолды қылған күдікті ұсталды
Астанада үй иесінің алтын бұйымдарын қолды қылған күдікті қолға түсті, деп хабарлайды Polisia.kz.
Алматы, NEGE. Белгілі болғандай, жас жігіт елорда тұрғынының үйіне екі рет қонаққа келген. Алғашқы келуінде ешкім назар аудармаған сәтті пайдаланып, ол байқатпай жатын бөлмеге кіріп, сөреден алтын сақинаны ұрлап кеткен.
Үй иелері ұрланған затты байқамағанына көз жеткізген ол, келесі келгенде тағы бір сақинаны ұрлаған. Жалпы құны шамамен 300 мың теңге тұратын алтын бұйымдардың жоғалғанын байқаған үй иесі, полицияға жүгінген.
Сарыарқа ауданы ПБ қызметкерлері жедел-іздестіру іс-шаралары барысында 20 жастағы жігітті анықтады. Белгілі болғандай, ол ақша иемдену мақсатында ұрланған сақиналарды ломбардқа өткізген.
Аталған факті бойынша қылмыстық іс қозғалды. Полицейлер заттай дәлелдемелерді тәркіледі.