Астанада талапкерлерді оқуға түсіруге уәде еткен оқытушы 3,5 жылға сотталды
Елордада жоғары оқу орнының қызметкері 18 талапкердің сеніміне кіріп, университетке оқуға түсуге «жәрдемдесу» сылтауымен қылмыстық әрекетке барған.
Астана, NEGE. Қалалық прокуратураның мәліметінше, оқытушы талапкерлерге белгіленген қабылдау тәртібінен тыс жоғары оқу орнына оқуға түсіруге уәде еткен. Ол әр талапкерден 600 мыңнан 900 мың теңгеге дейін ақша алған.
Сот барысында сотталушының қызметтік жағдайын пайдаланып, бірнеше рет алаяқтық жасағаны анықталған. Бұған қоса мемлекеттік айыптаушы оның жалған ресми құжаттарды қолдан жасап, жалған мөр әзірлегенін толық дәлелдеп шыққан.
«Сот үкімімен кінәлі адам 3 жыл 6 ай мерзімге бас бостандығынан айырылды. Сот үкімі заңды күшіне енді», – делінген Астана қаласының прокуратурасы таратқан хабарламада.
Сондай-ақ сотталған оқытушыдан материалдық залал өндірілген.