Астанада полиция формасымен видео түсірген блогер Justice Adilet ұсталды
Астанада Justice Adilet лақап атымен танымал блогер Әділет Қаликеев полиция формасымен түскен видеосынан кейін полиция бөлімшесіне жеткізілді.
Астана, NEGE. Бұл жөнінде қалалық полиция департаменті хабарлады.
«Полиция қызметкерлері әлеуметтік желілерге жүргізілген мониторинг барысында полицияның қызметтік киімін киіп, құқық қорғау органдары қызметкерлерінің абыройына нұқсан келтіретін бірнеше бейнеролик жариялаған ер адамды анықтады. Тексеру нәтижесінде 30 жастағы құқық бұзушының жеке басы анықталып, полиция бөліміне жеткізілді», – делінген хабарламада.
Блогер арнайы айырым белгілері бар қызметтік форманы заңсыз кигені және заңға қайшы контент жариялап, таратқаны үшін әкімшілік жауапкершілікке тартылды.
«Іс материалдары тиісті шешім қабылдау үшін сотқа жолданды», – деп хабарлады полицияның баспасөз қызметі.
Полицейлер құқық қорғау органдарының қызметтік киімін заңсыз кию, сондай-ақ полиция қызметкерлерінің беделін түсіруге және азаматтарды жаңылыстыруға бағытталған материалдарды тарату фактілеріне заң аясында қатаң құқықтық баға берілетінін ескертеді.