Астанада мас күйде көлік жүргізген Бас прокуратура қызметкері қамауға алынбаған

Астана, NEGE. Ол 29 наурызға қараған түні жұбайының атына тіркелген Cherry Tiggo автокөлігін мас күйде жүргізіп бара жатқан кезінде ұсталған, деп жазады журналист Михаил Козачков.

Өз кезегінде құқық бұзушы кінәсін мойындамаған. Ол ішімдік ішкенін мойындағанымен, көлікпен ешқайда бармағанын айтқан. Сөзінше, саябақта серуендеп келгеннен кейін жылыну үшін ғана рөлге отырған, ал көлікті басқа адам жүргізген, бірақ ол сол сәтте бір жаққа кетіп қалған-мыс.

«Алайда хаттамаға тіркелген бейнежазбада көлік жүріп келе жатқаны және рөлде дәл Әсет Жүкенов отырғаны анық көрінеді. Полиция ұстанымын сот отырысына қатысқан Астана прокуратурасының қызметкері қолдады», – деп жазады журналист Telegram-дағы арнасында.

Осыған байланысты сот оны Әкімшілік құқық бұзушылық кодексінің 608-бабы (жүргізушінің көлік құралын алкогольдік масаң күйде басқаруы) бойынша кінәлі деп таныды. Жаза ретінде ол 7 жылға жүргізуші куәлігінен айырылған, бірақ қамауға алынбаған. Өйткені осы Кодекстің 32-бабына сәйкес құқық қорғау органдарының қызметкерлері мен әскери қызметшілер әкімшілік қамауға алынбайды.

Сот қаулысы апелляциялық сатыдан өтіп, заңды күшіне енді.

Әсет Жүкенов денсаулығына байланысты демалыста болғандықтан, Бас прокуратура әзірге оған жұмыстан шығару немесе сөгіс жариялау сияқты шаралар қолданбаған.