Астанада құны 2,3 млрд теңгеден асатын пәтерлерді заңсыз иемдену әрекеті әшкереленді
Қаржылық мониторинг агенттігі әлеуметтік осал топтарға, оның ішінде көпбалалы отбасыларға, жетім балаларға және мүгедектігі бар адамдарға арналған пәтерлерді заңсыз иемдену фактісі бойынша тергеу бастады.
Алматы, NEGE. ҚМА мәліметінше, 2014-2016 жылдары А.Байжұманов «Төленді» тұрғын үй-құрылыс кооперативін басқара отырып, пайшылардың ақшалай қаражатын жымқырудың ауқымды схемасын ұйымдастырғаны үшін 8 жылға бас бостандығынан айырылған.
Кейін пәтерлердің бір бөлігі әлеуметтік осал санаттағы азаматтарға арналған тұрғын үйлердің құрылысын Астана қаласының әкімдігі аяқтаған.
«Бас бостандығынан айыру орындарынан босатылғаннан кейін А.Байжұманов жаңа заңсыз схема әзірлеген. Бұл схема «өткен күнмен рәсімделген» жалған құжаттарды пайдалану арқылы пәтерлерді заңсыз иемденуге бағытталған. Нәтижесінде 80-нен астам «жалған үлескер» жәбірленуші деп танылып, уәкілетті ұйымнан 170 жылжымайтын мүлік нысанына заңсыз құқық алған», – делінген ҚМА-ның хабарламасында.
Пәтерлерді өтеусіз алғаннан кейін Байжұманов пен оның сыбайластары оларды үшінші тұлғаларға сатуды жоспарлаған. Хабарламаға сәйкес, жалпы құны 2,3 млрд теңгеден асатын пәтерлерді заңсыз иемдену әрекеті әшкереленді.
Күдіктілерге қатысты қамауда ұстау түріндегі бұлтартпау шарасы таңдалды.