Астанада қыз баланың үстіне құрылыс қоршауы құлады
Оқиға Астананың Нұра ауданындағы құрылыс нысанының маңында болған. Жарақат алған қыз балаға медициналық көмек көрсетілген.
Астана, NEGE. Бұл туралы желі қолданушысы Валентина Бородихина хабарлады.
Оның айтуынша, аудан тұрғындары бұған дейін бірнеше рет әкімдікке жүгініп, аумақты абаттандыруды өтінген.
«Нұра ауданында баланың үстіне профильді қаңылтыр құлап кетті. Жақын маңдағы үйлердің тұрғындары ауданның көркейтілуін сұрап, әкімдікке бірнеше рет жазған, өйткені айнала лай-баптақ болғандықтан, адамдар аялдамаға қоршаудың бойымен, көлік жүретін жолмен барады. Барлық жерде құрылыс жүріп жатыр, жер қазылған, үш жылдан бері өмір сүруге қажетті қарапайым жағдай жоқ. Сөзге құлақ асуы үшін осындай жағдайларға дейін жеткізу керек пе еді?!» – деп жазды ол Threads желісінде.
Нұра ауданының полиция басқармасы құрылыс нысаны аумағын тиісті деңгейде ұстамағаны үшін мердігер ұйымның жауапты өкілі – учаске бастығы әкімшілік жауапкершілікке тартылғанын хабарлады.
Полиция мәліметінше, жарақат алған қыз балаға қажетті медициналық көмек көрсетілгенін, қазір оның өмірі мен денсаулығына қауіп жоқ екенін атап өтті.
Құқық қорғау органдары құрылыс компаниялары мен жауапты тұлғаларды қауіпсіздік талаптарын қатаң сақтап, нысандарға іргелес аумақтарды тиісті деңгейде ұстауға шақырды.