Астанада инвестициялық жобаларды іске асыру мәселелеріне арналған ауқымды іс-шара өтті
Елордада инвестициялық жобаларды іске асыру мәселелеріне арналған «Ашық есік күні» ауқымды іс-шарасы өтті, деп хабарлады Астана әкімдігінің ресми сайты.
Астана, NEGE. Бұл кездесу мемлекеттік құрылымдар мен бизнес қауымдастығы арасындағы өзара тиімді ынтымақтастықты тереңдетуге, сондай-ақ инвестициялық климатты жақсартуға бағытталған маңызды диалог алаңы ретінде ұйымдастырылды. Іс-шараның басты мақсаты инвесторлардың нақты проблемалары мен ұсыныстарын тыңдап, оларды шешудің пәрменді жолдарын бірлесіп қарастыру болды.
Іс-шараға Астана қаласы әкімінің орынбасары Евгений Глотов, Астана қаласының прокуроры Ерлан Өтегенов, сондай-ақ қалалық және аудандық әкімдіктер, инвестициялар және жер ресурстарын басқару комитеттері, Astana Invest қалалық инвестициялар орталығы, «Астана даму орталығы», «Атамекен» ұлттық кәсіпкерлер палатасы, «Азаматтарға арналған үкімет» мемлекеттік корпорациясы және ірі бизнес өкілдері қатысты.
Кездесуде инфрақұрылым, жер учаскелерін рәсімдеу, институционалдық келісімдер жасау және құқықтық қолдау мәселелері кеңінен сөз болды.
Астана қаласы әкімінің орынбасары Евгений Глотов инженерлік инфрақұрылым мәселесіне ерекше назар аударды. Ол инвестициялық жобалардың табысты жүзеге асуы көбінесе қажетті инфрақұрылымның уақытылы жеткізілуіне байланысты екенін атап өтті:
«Инфрақұрылым тарту – күрделі әрі көп уақытты қажет ететін үдеріс. Қаржыландыру, жобалық-сметалық құжаттама дайындау, мердігерді таңдау және бюджеттік рәсімдер бір жарым жылға дейін созылуы мүмкін. Кей жағдайда бюджеттен қажетті қаражат табылмай жатады. Сондықтан біз қазір инвестор өз қаражатына инфрақұрылымды салғаннан кейін оны мемлекет теңгеріміне алу немесе шығындарын өтеу сияқты балама тетіктерді қарастырудамыз», — деді ол.
Кездесу аясында келесі ірі жобалар таныстырылды:
• Wildberries логистикалық орталығының құрылысы;
• Өндірістік база құрылысы;
• Batyr School – 900 орындық жаңа мектеп-лицей жобасы;
• Спорттық ескек есу кешені;
• Басқа да инфрақұрылымдық және әлеуметтік маңызы бар нысандар.
