Астанада ғимарат қасбетіндегі кондиционерлерді жасыру міндеттелмек
Астананың жаңа дизайн-кодына кондиционерлердің сыртқы блоктарын орнатуға қатысты жеке талаптар енгізілмек.
Астана, NEGE. Талап бойынша, бірінші және екінші санаттағы тұрғын үйлерде кондиционердің сыртқы блогы арнайы сәндік қораптарға (корзиналарға) орналастырылуы тиіс, деп хабарлайды BES.media.
Қораптардың түсі мен безендірілуі ғимараттың қасбетімен үйлесуі қажет. Ал басқа тұрғын үйлерде ауа баптағыштарды ғимарат сәулетіне алдын ала кіріктіріп, көзге бірден түспейтіндей етіп орналастыру ұсынылады.
Техникалық талаптар да өзгереді. Кондиционердің сыртқы блогын тек қасбеттің қаптамасына немесе сәндік әрлеуіне бекітуге тыйым салынады. Ол міндетті түрде ғимараттың көтергіш құрылымына бекітілуі керек.
Бұрыннан салынған үйлерде кондиционер орнату туралы шешімді тұрғындар жалпы жиналыста қабылдайды. Алайда келісім алынғанның өзінде сыртқы блок қасбеттің сыртқы келбетін бұзбайтын сәндік жабынмен жабылуы тиіс.
Әзірге жаңа талаптардың орындалуын кім және қалай бақылайтыны белгісіз. Бұл үшін жеке бақылау тетігі кейінірек бекітіледі.