Астанада апалы-сіңлілі екі әйел күйеулерімен бірге «секс-притон» ұйымдастырды деген күдікке ілінді
Астана қалалық прокуратурасының хабарлауынша, апалы-сіңлілі екі әйел күйеулерімен бірге 2023-2025 жылдар аралығында тұрғын үй кешендерінде жыныстық қызмет көрсету үшін притон ұйымдастырған.
Астана, NEGE. Тергеу дерегі бойынша, қылмыстық топ мүшелері заңсыз әрекетке кәмелетке толмаған қыздарды тартқан.
«Ұйымдасқан қылмыстық топтың құрамына күзетшілер, әкімшілер, сондай-ақ әлеуметтік желілер мен мессенджерлер арқылы қызметтерді жарнамалаумен айналысқан тұлғалар кірген. Ұйымдастырушылар қаладағы түнгі клубтардан қыздарды іздеп, оларға жоғары табыс, тұрғылықты үй, қауіпсіздік және құпиялылықты қамтамасыз етуге уәде берген», – делінген қадағалаушы орган таратқан хабарламада.
Прокуратура мәліметінше, бұдан бөлек, қылмыскерлер клиенттердің алкогольдік масаң күйін пайдаланып, оларға күш көрсетіп, ақшасын бопсалаған, сондай-ақ оларды жалға алынған пәтерлерде заңсыз ұстаған.
«Барлық 15 қатысушы ұсталып, оларға қатысты күзетпен ұстау және үйқамақ түріндегі бұлтартпау шаралары қолданылды», – деп хабарлады прокурорлар.
Елорда прокуратурасы қылмыстық істі сотқа жолдады. Айыпталушылардың әрекетіне түпкілікті құқықтық баға сотта берілмек.