Астана тұрғыны бұрынғы әйелінің үстіне жанғыш сұйықтық құйып, өртеп жіберемін деп қорқытқан
Астанада ер адам бұрынғы әйелінің үстіне жанғыш сұйықтық құйып, қорқытқаны үшін жазаға тартылды.
Астана, NEGE. Қалалық прокуратура өкілдерінің хабарлауынша, ол қызғаныштан бұрын бірге тұрған әйелінің жұмыс орнына жанғыш сұйықтық құйылған бөтелке алып барып, «өртеп жіберемін» деп қорқытқан. Осылайша ол әйелмен қарым-қатынасын қалпына келтірмек болған.
Ол тіпті әйелдің үстіне әлгі сұйықтықты құйып, өміріне қауіп төндірген. Оның құқыққа қайшы әрекеті сотта дәлелденді.
Сот үкімімен елорда тұрғынына 60 сағат қоғамдық жұмыс түріндегі жаза тағайындалып, жәбірленушіге жақындауға тыйым салынды.
Үкім заңды күшіне енген жоқ.
Прокуратура адамның өміріне, денсаулығына қарсы жасалған кез келген әрекет, оның ішінде қорқыту мен қудалау қылмыстық жауаптылыққа әкеп соғатынын ескертеді.