Астана мен республикалық маңызы бар қалаларға бірыңғай дизайн-код енгізіледі
Мәжілісмендер елорда мен басқа да республикалық маңызы бар қалаларды дамыту мәселелері бойынша заңнамалық түзетулерді бірінші оқылымда мақұлдады.
Алматы, NEGE. Заң жобасын Мемлекет басшысының тапсырмасы бойынша Ұлттық экономика министрлігі әзірлеген. Ол жер қатынастары, сәулет және құрылыс, көші-қон, жарнама, экология және басқа да салалардағы мәселелерді шешуге бағытталған.
Түзету авторларының пікірінше, өзара үйлесімсіз әрі ретсіз орналастырылған сыртқы (визуалды) жарнамалар, маңдайшалар қазіргі уақытта елорда мен басқа да қалалардың әсемдік және сәулеттік келбетіне нұқсан келтіріп тұр. Осыған байланысты республикалық маңызы бар қалалар мен елорданың мәслихаттарының құзыретін кеңейтіп, дизайн-кодты бекіту нормасын енгізу ұсынылады.
Түзетулер аясында ашық кеңістікте аудиожарнама таратуға, сондай-ақ жаяу жүргіншілер жолында, велосипед жолында, автожолдар мен көшелерде сыртқы (визуалды) жарнамаларды орналастыруға тыйым салынады.
Заң жобасын әзірлеушілердің айтуынша, бұл азаматтардың қауіпсіздігі үшін қажет. Осы ретте Жер кодексіне, Әкімшілік құқықбұзушылық туралы кодекске және тағы 6 заңға өзгеріс енгізіледі.