Астана мен Алматы көшелеріндегі ақылы жеке тұрақтар жабылады
Депутат Бақытжан Базарбек Facebook-парақшасында Астана мен Алматы көшелеріндегі ақылы жеке тұрақтардың жабылатынын хабарлады.
Астана, NEGE. Базарбектің айтуынша, Құрылыс кодексі жобасына енгізілген түзетулерді жұмыс тобы қолдады. Осы өзгеріс арқылы Жер кодексінің 109-бабына өзгеріс енгізіліп, екі қаланың көшелеріндегі ақылы тұрақтар жойылады.
«Алматыда олигархтар арнайы фирмалар арқылы халықтан тұрақ ақысы жинап, қаланың бюджеті миллиардтаған теңгеден айырылғанын барлығы біледі. Кінәлілер сотталды, бірақ жүйе тоқтаған жоқ – ақылы тұрақтар Алматыда да, Астанада да жұмысын жалғастырды. Халық төлеп жатқанда, біреулер сол ақшамен байып отырды», – дейді депутат.
Базарбектің сөзінше, ақылы тұрақтар ешқандай инвестиция немесе инфрақұрылымдық өзгеріс әкелмеді, тек кейбір адамдардың қалтасын толтырды.
«Біз бұл жүйеге нүкте қоямыз. Дағдарыс кезінде халық есебінен баю – қоғамға қарсы қылмыс. Әділдік қалпына келуі керек. Енді дүйсенбі күні салалық комитеттің соңғы шешімін күтеміз», – деді депутат.
Енді әкімшілік Астана мен Алматыдағы жол бойындағы бос учаскелерді жеке ақылы тұрақтар орналастыру үшін уақытша пайдалануға бере алмайды. Автотұрақтардан түскен барлық қаражат «олигархтардың қалтасына емес», тікелей жергілікті бюджетке түседі.
