Астана маңында жеңіл моторлы ұшақ апатқа ұшырап, екі адам қаза тапты
Астана қаласына жақын орналасқан Жоламан әуеайлағы маңында жеңіл моторлы ұшақ апатқа ұшырап, екі адам көз жұмды. Бұл туралы ҚР Көлік министрлігі ресми түрде хабарлады.
АЛМАТЫ, NEGE. Министрліктің мәліметінше, бүгін шамамен сағат 11:30 кезінде TL-2000 маркалы жеңіл моторлы ұшақ оқу-жаттығу ұшуын орындау кезінде апатқа ұшыраған. Аталған ұшақ жеке тұлғаның меншігінде болған.
"Алдын ала деректерге сәйкес, ұшақ бортында екі экипаж мүшесі болған. Өкінішке қарай, екеуі де апат салдарынан оқиға орнында қаза тапты," — делінген министрлік таратқан хабарламада.
Қазір авиациялық оқиғаға байланысты тиісті тексеру жұмыстары басталды. Қолданыстағы тәртіпке сай, оқиғаның мән-жайын анықтау үшін арнайы комиссия құрылып, тергеу жүргізілмек.
Көліктегі оқиғалар мен инциденттерді тергеу департаментінің мамандары апат орнына жіберілді.
