Асқар Мамин халықты вакциналау жұмысын жалғастыруды тапсырды
ҚР Премьер-министрі Асқар Мамин елдегі санитариялық-эпидемиологиялық ахуал туралы Үкімет отырысын өткізді.
Нұр-Сұлтан, NEGE. «Дельта штамның таралуына байланысты өңірлерде эпидемиологиялық жағдай нашарлады. Республика бойынша науқастану айтарлықтай көбейген. Ауруханадағы орындар санының 56 пайызы, ал реанимациялық орындардың 44 пайызы толды», – деді Асқар Мамин. Үкімет басшысы пандемиядан шығудың жалғыз жолы – вакциналау екенін еске салды. «Қазіргі уақытта 5,5 млн-ға жуық адам вакцинаның бірінші компонентін ектірді және 4 млн-ға жуық адам екінші компонентін алды. Бұл жұмысты жалғастыру қажет», – деді Премьер-министр.
Бұған дейін ҚР Денсаулық сақтау министрі Алексей Цой Үкімет отырысында елдегі эпидемиологиялық жағдайды баяндаған еді. Қазақстан Республикасы 26 маусымнан бері «қызыл» аймақта тұр. Түркістаннанбасқа өңірлер түгел «қызыл» аймақта.