Арман Шораев: «Qazaq» деген сөзді қорламаңыздар
Қоғам белсендісі Арман Шораев «QAZAQ» деген сөздің қор болып жатқандығын айтып, әлеуметтік желіге видео жариялады.
Алматы, NEGE. Нақтырақ айтсақ, Шораев «Qazaq TV» телеарнасының болашағына алаңдаушылық білдірген.
«Qazaq TV» – мемлекеттік телеарна. Оның жұмысына жыл сайын бюджеттен бірнеше миллиард теңге жұмсалады. «Qazaq» деген әдемі атауы бар. Бірақ, 3-4 ай болды, сол телеарнаны тегін көрсетілімнен мүлдем алып тастады. Оның орнына «Мир» деген ресейдің телекомпаниясын енгізді. 24 сағат бойы орыс тілінде шүлдірлейді», – деді Арман Шораев.
Белсенді аталған видео арқылы өз ойын айтып, жауапты тұлғаларға үндеу жариялады.
«Аида Балаева ханымға сұрақ қойғым келеді. Аида ханым, сіздер мына «Qazaq TV» деген атауды «Малай ТВ»-ге ауыстырасыздар ма немесе өзіңіз басқаратын Ақпарат министрлігін Қазақстан Республикасында Ресейдің ақпаратын, Ресейдің саясатын тарататын министрлік деп өзгертесіздер ме? Әйтеуір, не істесеңіздер де «Qazaq» деген телеарна атауында бар сөзді бекерге қорламаңыздар», – дейді А.Шораев.