Арқалықта полицейлер қай көлікті тоқтатпау керегін арнайы чаттан біліп отырған
Арқалық қаласында жол-патруль полициясы қызметкерлері қолданатын арнайы WhatsApp-чаты бар екені белгілі болды. Онда олар өздерінің таныстары мен жақындарының көліктерінің суреттерін әріптестері тоқтатпауы үшін жіберіп отырған. Бұл туралы сотта бұрынғы полицей мәлімдеді.
Астана, NEGE. Арқалықта жол-патруль полициясының инспекторы 4 млн теңге айыппұлға тартылды. Ол мас күйінде көлік жүргізгені үшін жүргізуші куәлігінен айырылған азаматтан пара ретінде автокөлік шиналарын алып, оған әрі қарай да көлік жүргізуге мүмкіндік берген.
Іс барысында анықталғандай, шиналарды алғаннан кейін капитан әлгі жүргізушінің көлігінің суретін «ГАИ» атты WhatsApp-чатына жіберген. Бұл чатта Арқалықтағы патрульдік полиция қызметкерлері отырған.
Соттағы айғаққа сәйкес, бұл топқа полицейлер көбіне өздерінің таныстары, туыстары мен достарының көліктерін ғана жібереді. Яғни, көліктің суреті осы чатта болса, жол полициясы оны тоқтатпайды.
Бұған дейін Мәжіліс депутаты Бақытжан Базарбек жолдағы тәртіпті күшейтіп, құқық қорғау органдарын заң бұзған жүргізушілерді қорғайтын қызметкерлерден тазарту қажет екенін айтқан еді.
