Арқалық педагогикалық институты университет мәртебесін алды
ҚР Ғылым және жоғары білім министрлігінің 2025 жылғы 17 наурыздағы № 118 бұйрығына сәйкес «Ы.Алтынсарин атындағы Арқалық педагогикалық институты» коммерциялық емес акционерлік қоғамы «Ыбырай Алтынсарин атындағы Арқалық педагогикалық университеті» коммерциялық емес акционерлік қоғамы болып қайта аталды.
Алматы, NEGE. Бұл өзгеріс Қазақстанның аймақтарын дамыту, өңірлердегі экономикалық теңсіздікті жою мәселелерімен тығыз байланысты. Мемлекет басшысы Қасым-Жомарт Тоқаев Ұлттық құрылтайдың төртінші отырысында аймақтардағы экономиканың өркендеуіне серпін беретін жаңа мүмкіндіктер ашу қажеттігін атап өткен болатын. Осы тұрғыдан алғанда, Арқалық институтының университет атануын өңірлік білім беру мен экономика үшін үлкен серпін деп қарастыруға болады.
Ыбырай Алтынсарин атындағы Арқалық педагогикалық университеті – экономиканың барлық салалары үшін педагогтар мен ғылыми кадрлар даярлайтын еліміздегі жетекші педагогикалық жоғары оқу орындарының бірі. Университет 1972 жылы құрылып, бес жылдан кейін Ыбырай Алтынсарин есімімен аталды. Алғашқыда физика-математика және филология факультеттері ашылды.
Бүгінде оқу орнында «Жаратылыстану және ақпараттандыру», «Педагогика және филология», «Тарих және өнер» факультеттері бар. Университет бакалавриатты 29 білім беру бағдарламасы бойынша даярлайды. Сонымен қатар оқу орнының материалдық-техникалық базасы соңғы заманауи технологиялармен жабдықталған. Физика, химия және информатика мамандықтары бойынша ғылыми-тәжірибелік зертханалар жұмыс істейді.