Арыс әкімі ұлының қатысуымен болған жантүршігерлік жол апатына қатысты пікір білдірді
Арыс қаласының әкімі Қайсар Маңқараев Астана-Павлодар тасжолында болған жол апатында көлікті ұлы тізгіндегенін растады.
Астана, NEGE. Ол ұлының кәмелетке толған азамат екенін және заңға сай өз әрекеті үшін өзі жауап беретінін айтты, деп жазады NewTimes.
Бұған қоса Маңқараев тергеу барысына ықпал ету үшін өзінің қызметтік лауазымын пайдаланбайтынын алға тартты.
«Мен ешқашан қызметтік өкілеттігімді жеке басымның мүддесі үшін пайдаланған емеспін және пайдалануға ниетім де жоқ. Тергеу барысына немесе іс бойынша қабылданатын процессуалдық шешімдерге ықпал етуге ешқандай әрекет жасаған жоқпын және жасамаймын деп жауапкершілікпен мәлімдеймін. Тергеу Қазақстан Республикасының заңнамасы талаптарына сәйкес, тек уәкілетті мемлекеттік органдар тарапынан жүргізілуі тиіс және солай жүргізіледі», – деп атап өтті ол.
Сондай-ақ әкім ұлының бір жылдың ішінде жол қозғалысы ережелерін 29 рет бұзғаны және сот алдында Астанадағы тіркеуін Екібастұзға ауыстырғаны туралы ақпараттан бейхабар екенін атап өтті.
Айта кетейік, биыл 29 мамырда Астана – Павлодар тасжолында жантүршігерлік жол апаты болып, апат салдарынан 21 жастағы Талғат есімді студент жігіт екі аяғынан айырылған. Көлік рөлінде Арыс қаласының әкімі Қайсар Манқараевтың 22 жастағы ұлы Ердәулет Закиров отырған.
Жол апатында аяғынан айырылған студенттің туыстары айыпталушының әкесінің қызметі тергеудің объективті өтуіне әсер етуі мүмкін деп қауіптенетінін, бұған қоса айыпталушының отбасы бастапқы көмек көрсеткеннен кейін байланысқа шығуды тоқтатқанын мәлімдеді.
