Архив: Мәскеу Олимпиадасының чемпиондары
Әлеуметтік желіде Мәскеу Олимпиадасынан елге оралған қазақстандық спортшылардың видеосы жарияланды.
Алматы, NEGE. Мәскеуде өткен жазғы Олимпиада ойындарын жұрт әлі күнге аңыз қылып айтады. 1980 жылы 80 мемлекеттің кіл мықты 5 мыңнан астам спортшысы КСРО астанасына ағылды. Олар спорттың 21 түрінен бақ сынасты.
Командалық есепте 80 алтын еншілеген КСРО ешкімге дес бермеген-ді. Екі алтынды қазақ балуандары Шәміл Серіков пен Жақсылық Үшкемпіров қанжығаға салған. Қазақстандықтар жалпы 6 алтын, 3 күміс, 7 қола жүлдемен ел абыройын асқақтатты. Мәскеуден ел намысын абыроймен қорғап қайтқан спортшыларды Қазақстан Компартиясының бірінші хатшысы Дінмұхамед Ахметұлы құрметпен күтіп алыпты.
Архивте сақталған бейнематериал желіге тарап, көпшіліктің ықыласына ие болуда.
