Аргентина футзалдан әлем чемпионатының финалына шықты
Футзалдан әлем чемпионатының финалында Бразилия және Аргентина құрамалары кездеседі, деп хабарлады ҚазАқпарат.
Алматы, NEGE. Жартылай финалдың екінші жұбында Аргентина мен Франция ойнады. Ойын барысында франциялық ойыншылар азулы қарсыласына лайықты төтеп бере білді. Қос құрама 37-минутқа дейін екі-екі голдан соғып үлгерді.
Аргентиналық Клаудиньо соққан гол өз құрамасына жеңіс алып келді. Осылайша Аргентина құрамасы қарсыласын 3:2 есебімен тізе бүктіріп, финалға берілген екінші жолдамаға қол жеткізді.
Енді олар 6 қазанда финалда Бразилиямен ойнайды. Дәл сол күні 3-орын үшін Франция мен Украина кездеседі.
Еске салсақ, бұдан бұрын Қазақстан құрамасы ширек финалда Аргентинаға жол берген еді.
