Әпкесін отшашумен құттықтамақ болған Астана тұрғыны 5 тәулікке қамалды
Елордалық полицейлер қаладағы ойын-сауық орындарының бірінің маңындағы автотұрақта отшашу атқан ер адамды ұстады.
Астана, NEGE. Тәртіп сақшыларының хабарлауынша, 34 жастағы жігіт әпкесін туған күнімен құттықтамақ болып отшашу ұйымдастырған. Алайда оның бұл әрекеті түнгі уақытта қала тұрғындарының тыныштығын бұзған.
«Бұл факт бойынша ер адамға ұсақ бұзақылық жасағаны үшін әкімшілік хаттама толтырылды. Сот қаулысымен құқық бұзушы 5 тәулікке әкімшілік қамауға алынды», – делінген полиция хабарламасында.
Полиция қызметі тұрғындардың тыныштығын құрметтеуге және пиротехникалық бұйымдарды тек рұқсат етілген орындарда, қауіпсіздік талаптарын қатаң сақтай отырып, пайдалануға шақырады.