Антикор Атырау облысы әкімінің орынбасары мен мемлекеттік сатып алулардағы мердігер компания арасындағы байланысты тексеріп жатыр
Сыбайлас жемқорлыққа қарсы іс-қимыл агенттігі бұқаралық ақпарат құралдарында шыққан материалдардан кейін Атырау облысы әкімінің орынбасары Қайрат Нұртаевтың жеке құрылыс компаниясымен байланысы болуы мүмкін деген сыбысқа қызығушылық танытты.
Алматы, NEGE. «За нами уже выехали» Telegram каналы таратқан мәліметке сәйкес, Қайрат Нұртаев облыс әкімінің орынбасары қызметіне дейін «БатысАльянсСтрой» ЖШС-нің бас директоры болған. Бұл компания ұзақ уақыт бойы жергілікті атқарушы органдардың тендерлерін ұтып келген.
Бұған дейін БАҚ-та бұл ЖШС-нің AMANAT партиясынан Мәжіліс депутаты Әділ Жұбановпен байланысы бар екені жазылған болатын.
Өз кезегінде Агенттік «БатысАльянсСтрой» ЖШС-нің мемлекеттік сатып алуларға қатысуы кезінде жол берілген бұзушылықтар туралы әлеуметтік желілерде жарияланған ақпарат ресми тіркелгенін хабарлады. Қазір бұл мәселе бойынша Антикор мен ішкі мемлекеттік аудит қызметкерлері жұмыс жүргізіп жатыр.
«Қазақстан Республикасы Қылмыстық-процестік кодексінің 181-бабы, 5-тармағына сәйкес, тексеру жүргізу үшін материалдар Атырау облысы бойынша ішкі мемлекеттік аудит департаментіне жолданды. Сонымен қатар, қазіргі уақытта Атырау облысы бойынша Сыбайлас жемқорлыққа қарсы қызмет департаменті лауазымды тұлғалар мен «БатысАльянсСтрой» ЖШС арасындағы мүдделер қақтығысының бар-жоғын зерттеп жатыр», – делінген хабарламада.
