Almaty Open ATP 250 әлемдегі үздік теннис турнирлерінің үздік үштігіне енді
Almaty Open ATP 250 әлемдегі үздік теннис турнирлерінің үздік үштігіне енгізілді, деп хабарлайды Prosports.kz
Алматы, NEGE. Әлемнің жетекші теннисшілері 13-20 қазанда өткен Almaty Open жарысын ATP Tour халықаралық күнтізбесіндегі үздіктердің бірі ретінде таныды.
Ойыншылардың жасырын дауыс беруі нәтижесінде Алматы АТР 250 турнирі 5-тен 4.45 рейтингі алып, әлемдегі үздік үштікке кірді. Мұндай көрсеткіш санаты жоғары болып есептелетін ATP 500 турнирлерінің көпшілігінен асып түскен, тек рейтингісі 4.5 болған Мадридтегі masters жарысынан сәл қалып қойған.
Жалпы бағаның ішіне ойын корттарының сапасы, киініп-шешінетін орынның қолайлылығы, көрермендер саны, аренадағы ахуал және басқа 30-дан астам түрлі көрсеткіштер кіреді. Турнирге қатысушылар мен қонақтардың пікірінше, алғаш рет оңтүстік астанада өткізілген Almaty Open ATP 250 халықаралық турнирі әлемдік деңгейдегі спорттық шоуға айналды.
Турнирдің жоғары стандарттары – Қазақстан теннис федерациясының президенті Болат Өтемұратовтың ұзақ мерзімді стратегиясының бір бөлігі, оның басты мақсаты - Almaty Open мәртебесін ATP 500 деңгейіне дейін көтеру. Бұл Қазақстанға әлемдік теннис жұлдыздарын көбірек тартып, елде спорттың дамуы мен кеңінен таралуына оң әсер етеді.
Жергілікті көрермендердің қолдауы мен жанкүйерлердің мінбеде ерекше және есте қаларлықтай ахуал орнатуы турнирдің жоғары баға алуына әсер еткен маңызды факторлардың бірі болды.
Алматыға нағыз спорт мерекесін тарту еткен Almaty Open турнирінің ұйымдастырушылары келесі күзде барлық отбасылардың көңілді демалуы үшін жарысты кең ауқымды тақырыптық аттракциондармен толықтыруды жоспарлап отыр.
