Алматының Наурызбай ауданында жыл соңына дейін 130 көше жөнделеді
Алматы қаласының Наурызбай ауданын дамытудың басым бағытының бірі жол инфрақұрылымын дамыту болып табылады, деді әкім Ерболат Досаев қала тұрғындарымен кездесуде.
Алматы, NEGE. «Наурызбай ауданының барлық шағын аудандарында жолдарды ағымдағы жөндеу жұмыстары қызу жүргізілуде. Бүгінгі таңда 70 көшеде 30 мың м2 жол жөнделді. Қараша айының соңына дейін 130 көшені қамтитын тағы 25 мың м2 жолды жөндеу жоспарланған.
Жөндеуге 735 млн. теңгеден астам қаражат бөлінді. Сонымен қатар, Қалалық мобилділік басқармасы осы жылдың шілде айында Ақжар және Шұғыла шағын аудандарында 10 көше бойынша 6,5 км жол салуды бастады. 10 көшеде 6,9 км жолға орташа жөндеу жүргізілді. Осы жылдың қараша айының соңына дейін ұзындығы 7 км болатын тағы 6 көшеге орташа жөндеу жұмыстары жүргізіледі», - деді әкім.