Алматыға «Қайрат» – «Реал Мадрид» матчын тамашалауға шетелден 4–5 мыңға жуық жанкүйер келеді
Алматыда өтетін Чемпиондар лигасының «Қайрат» – «Реал Мадрид» матчын тамашалау үшін шетелден 4–5 мыңға жуық жанкүйер келеді. Бұл туралы Туризм және спорт министрі Ербол Мырзабосынов хабарлады.
Алматы, NEGE. Министрдің айтуынша, Қазақстан жанкүйерлерді қабылдауға толық дайын. Алматыдағы Орталық стадион УЕФА-ның 4-санат талабына сай, ал қаланың инфрақұрылымы мұндай деңгейдегі шараларды өткізуге мүмкіндік береді.
Ербол Мырзабосынов бұл матч елдегі спорт туризмі үшін тарихи маңызы бар шара екенін атап өтті.
Сондай-ақ, әлемнің ең атақты командаларының бірі саналатын «Реалдың» сапары Алматы экономикасына оң ықпал етіп, қонақүйлер, мейрамханалар мен туристік қызметтердің дамуына серпін беретінін жеткізді.